Qodirov Ayub (1918.10.5, Buxoro-1981, Toshkent) -  sozanda  (nay), O’zbekiston xalq artisti (1970). Toshkent konservatoriyasini tugatgan (1956). Buxoroda Ma’rufjon Toshpo’latov, Ostonaqul Nurjonov va Usta Tohir-sozgarlardan nay chalish usullarini, o’zbek va tojik mumtoz kuylarini o’rgangan. Buxoro musiqa bilim yurtida o’qituvchi hamda Yosh tomoshabinlar teatrida musiqa rahbari (1934-1936), O’zbek davlat filarmoniyasida xalq cholg’u orkestri (1936-1938, 1950-1956, 1968-1974), Tamaraxonim ansambli (1938-1946) da sozanda, “Shodlik” ansamblida musiqa rahbari (1956-1957, 1966-1968), Toshkent musiqa bilim yurtida pedagog (1978 yildan). Ijro uslubi mukammal texnikasi, asar mazmunini chuqur his qilishi, nay ifoda vositalaridan keng foydalanishi, ijro erkinligi bilan ajralib turadi. Repertuaridan “Farg’onacha”, “Subhidam”, “Cho’li iroq” , “Chaman yalla”, “Segoh”, “Qaytarma”, “Tong oromi”, “Chorgoh” kabi xalq va mumtoz kuylar o’rin olgan. Osiyo va Yevropa mamlakatlarida gastrolda bo’lgan.   

Ma'lumot: O'zbekiston milliy ensiklopediyasi. Toshkent.2005.