Burmakin Vladimir Ivanovich (1938.9.1,Toshkent) – rassom, O‘zbekiston Badiiy Akademiyasi haqiqiy a’zosi (1997), O‘zbekistonda xizmat ko‘rsatgan san’at arbobi (1981). Respublika rassomlik bilim yurti (1957) va Toshkent teatr va rassomlik san’ati instituti (1965)ni tugatgan. Burmakinning mahobatli, ayniqsa, dastgohli  rangtasvir borasidagi izlanishlari, voqeaband tasvirlari, serjilo obrazlari diqqatga sazovor. Ayollar ruhiy holati jonli ifodalangan portretlar (“Boysun go‘zali”, 1968; “Elvira”, 1983 va boshqa), rangdor, bezak mujassamotlar (“Intizor ayollar”, 1962; “Ota”, 1973; “Darаxt haqida qo‘shiq” triptixi, 1975; “Kimning oti yaxshiroq?”, 1979; “O‘zbekistonning hozirgi fan arboblari”, 1984 va boshqa), “Farhod va Shirin” (hamkorlikda) devoriy rasmlari va boshqani yaratdi.

 O‘zbekiston milliy ensiklopediyasi T:. 2001