1984 yil 30 iyulda Amerikaning NBC telekanali “Santa Barbara “ teleseriali namoyishini boshladi. Salkam 10 yil davomida tomoshabinlarni televizor qarshisiga “mixlab qo‘ygan” ushbu serial jami 2137 qismdan iborat bo‘lgan. Santa Barbara shaharchasida yashovchi badavlat Kepvellar oilasining hayoti bilan bog‘liq voqealar rivoji muxlislarni shunchalik o‘ziga tortganki, jahonning ko‘plab mamlakatlaridagi turli millat vakillari har oqshom xonadonlariga “Tashrif buyuruvchi” serial qahramonlarini o‘z qadrdonlaridek qabul qila boshlashgan. Ularning qayg‘ulariga hamdard, quvonchlariga sherik bo‘lishgan. “Santa Barbara”ni teleserial janrining, ta’bir joiz bo‘lsa, bugungi “Jumonglar” u “Tutash taqdirlar”ning tutingan otasi deb atash mumkin. Xalqimizni jiddiy, badiy yuksak adabiyot va sa’nat namunalaridan bahramand etishga har qancha intilmaylik, baribir “vaqt o‘ldirish”ga mo‘ljalangan, muvaqqat taassurotlar uyg‘otuvchi zamonaviy tomosha janrining hayotimizga tobora singib borayotgani bilan hisoblashmaslikning iloji yo‘q.