Beruniy ko'chasining Matlubot ko'chasi bilan kesishgan joyda. Me'morlari: Ya. Mansurov, S.Kozimov; muhandis A.Zokirov. 1991 yil 30 aprelda ishga tushirilgan. Bekatning me'moriy va haqiqiy echimida temir-beton yig'ma konstruksiyalar va ustunlardan foydalanilgan. Vestibyullardan biri birinchi bor o'ziga xos konstruktiv va hajmiy echim orqali (yer osti o'tish yo'lagi va vestibyul yaxlit hajmda olinib, bir-biridan vitraj-yorug'likni o'tkazuvchi namoyon tarzidagi to'siq bilan ajratilgan) bajarilgan. Me'moriy-badiiy g'oyalarning echimi bekat nomi (“Tinchlik”)da o'z aksini topgan, platformaning yo'l yoni devorlaridagi ranglar uyg'unlashtirilgan orombaxsh hayot mavzusiga bag'ishlangan. Ustunlar yuqoriga kengaya boradi. Ular Nurota marmari bilan bezatilib, yuqorisiga mayin yorug'lik taratuvchi elektr yoritqich o'rnatilgan. Umuman, bekatning ichki qismida vitraj, girixsimon bezaklar, badiiy sopoldan ishlangan bo'rtma tasvirlar hamda G'ozg'on, Nurota marmarlari bilan o'ziga xos me'moriy badiiy ko'rinish barpo etilgan.