O'zbekistonda xizmat ko'rsatgan san'at arbobi, kompozitor va dirijyor Xayri Izomov 30- yillarda musiqa dunyosiga kirib keldi. U o'zbek professional kompozitorilarining ikkinchi avlodiga mansub. O'zining ko'p qirrali ijodiy va dirijyorlik faoliyati bilan respublikamiz musiqa san'ati rivojlanishiga munosib hissa qo'shib kelmoqda. Izomov Xayri G'ulomjon o'g'li Buxoro shahrida, ziyoli oilasida 1922 yilning 30 dekabrida tavallud topgan. 1928 yildan umumta'lim maktabida o'qidi. Bolaligidan musiqaga qiziqar edi. 1931 yili Buxoro musiqa texnikumida skripka bo'yicha o'qidi va 1935 yili bitirdi. 1935-1936 yillarda Buxoro musiqali drama teatrida sozanda bo'lib ishladi. Ma'lumki, 1936 yili T.Jalilov boshchiligida O'zbek davlat filarmoniyasi qoshida o'zbek cholg'ulari ansambli tashkil topgan edi. Mazkur ansamblga boshqa sozandalar qatori 14 yoshli Xayri Izomov ham ishga taklif qilindi. U 1937 yili Moskvada o'tkazilgan O'zbekiston adabiyoti va san'ati dekadasida eng yosh sozanda sifatida qatnashdi. X.Izomov 1964-1966 yillarda Afg'oniston hukumati taklifiga binoan Qobul radiosida maslahatchi bo'lib ishladi. 1966 yili Toshkentga qaytgach, radio qoshidagi «O'zbek halq cholg'ulari» orkestrida dirijyor vazifasida ishini davom ettirdi. X.Izomov dirijyorlik va jamoatchilik ishlari bilan band bo'lishiga qaramay musiqaning turli janrlarida yangi-yangi, jozibali asarlar yaratdi. U yaratgan estrada qo'shiqlaridan «O, Dilbar», «Bu Muhabbat», «Salom-aleykum», «Ishva ko'z», (S.Xolmuhamedov so'zi) mashhur bo'lib ketdi. Bastakorlar uyushmasining ommaviy janrlar komissiyasiga uzoq yillar raislik qilgan. 1954 yili «O'zbekiston hukumatining faxriy yorlig'i», 1967 yili «O'zbekistonda xizmat ko'rsatgan artist» va 1974 yili «O'zbekistonda xizmat ko'rsatgan san'at arbobi» faxriy unvonlari va 2000 yilda «El- yurt hurmati » ordeni bilan taqdirlangan.