Urgut tumani Samarqand viloyatining janubi-sharqiy qismida joylashgan. 1926 yil 29 sentyabrda tashkil etilgan. Maydoni 1,12 ming km². Aholisi 348,2 ming kishi, asosan, o’zbeklar, shuningdek, tojik, rus, tatar, yahudiy, ozarbayjon va boshqa millat vakillari ham yashaydi. O’rtacha zichligi 1 km² ga 310,9 kishi (2005). Tumanda 1shahar (Urgut), 12 qishloq fuqarolari yig’ini bor. Markazi — Urgut shahri Tuman Zarafshon tog’ tizmalarining davomi bo’lgan Chaqilikalon va Qoratepa torlarining yon bag’irlarida joylashgan. Sharqiy, janubiy va g’arbiy qismlari past-baland tekislik bo’lib, bir qancha soyliklar bor. Iqlimi keskin kontinental. Chaqilikalon va Qoratepa tog’lari orasidagi Taxtaqoracha dovoni (1675 m) orqali Katta O’zbekiston trakti o’tadi. Marmar, ohaktosh, marganes, mis, vol’fram va boshqa foydali qazilmalar bor. Oqqo’rg’on, G’ijduvonsoy, Urgutsoy, Qoratepasoy, Darg’om, Yangiariq, Yangi Urgut va boshqa kanallar bor. Xo’jaligining yetakchi tarmoqlarini Qishloq xo’jalik mahsulotlarini qayta ishlash, qurilish va mahalliy sanoat tarmoqlari tashkil etadi. O’rta va kichik korxonalar, mikrofirmalar bor. Meva, go’sht, sutni qayta ishlash, non pishirish, qandolatchilik, har xil salqin ichimliklar ishlab chiqarish korxonalari, ta'mirlash korxonalari ishlab turibdi. “Urg-Gazkarpet”, “Urg-ANTET YaShAM, “Urgut qoplon”, “Urgut SamNegin” gilam ishlab chiqarishga ixtisoslashgan qo’shma korxonalar faoliyat ko’rsatadi. Marmar toshni qayta ishlaydigan “UrgutLADOmarmar”, qurilish buyumlari ishlab chiqaradigan “Samplastik”, tamakini qayta ishlaydigan “UzBAT” qo’shma korxonalari ishlab turibdi. Tumanda hunarmandchilik qadimdan rivojlangan. Qishloq xo’jalik g’alla, sabzavot, kartoshka, meva, uzum hamda chorvachilik mahsulotlarini yetishtirishga ixtisoslashgan. Sug’oriladigan yerlarga paxta, don ekinlari, kartoshka, sabzavot va poliz ekinlari, yem-xashak ekinlari ekiladi. 1,4 ming ga yer bog’ va tokzor bilan band. 380 dan ziyod fermer xo’jaligi faoliyat ko’rsatadi. Tuman jamoa va xususiy xo’jaliklarida qoramol, qo’y va echki, parranda, yilqi boqiladi. Pillachilik rivojlangan. 127 umumiy ta'lim maktabi, 2 maxsus sog’lomlashtirish internati faoliyat ko’rsatadi. 70 jamoat kutubxonasi, madaniyat uylari bor. 8 kasalxona, 36 qishloq davolash bo’limi, 27 feldsher- akusherlik punkti va boshqa tibbiy muassasalar, dam olish maskanlari va yozgi oromgohlar aholiga xizmat ko’rsatadi. 1992 yildan “Chinor” tuman televideniesi eshittirishlar olib boradi.