SHAXSIY KABINETGA KIRISH
.
SSENARIYLAR
 Barcha ssenariylar
ARXIV
Avgust 2022
YaDuSeChPaJuSh
 123456
78910111213
151617181920
21222324252627
28293031   
Surxondaryo viloyatidagi Termiz tumani tashkil topgan kun
1926-09-29

Termiz tumani. Surxondaryo viloyatining janubiy qismida joylashgan. 1926 yil 29 sentyabrda tashkil etilgan. Maydoni 0,86 ming km2. Aholisi 79,8 ming kishi, asosan, o’zbeklar, shuningdek, turkman, tojik va boshqa millat vakillari ham yashaydi. 1 km2 ga 92,8 kishi to’g’ri keladi (2005). Tumanda 5 qishloq fuqarolari yig’ini bor. Markazi – Uchqizil qishlog’i. Hududining sharqiy qismi Hisor tog’ tizmasining davomi va uning etaklari, cho’llar, adirlar va qirlar bilan band. Iqlimi kontinental. Amudaryo, Qorasuv, Sherobod daryolari tuman hududi orqali o’tadi. Foydali qazilmalardan neft bor. Termiz shahridan 20 km quyida, Amudaryo o’rtasida Payg’ambororol qo’riqxonasi joylashgan. Tumanda Zang kanali (Surxondaryodan suv oladi), g’alaba. Amu-Zang (Amudaryodan suv oladi) sug’orish kanallari, Uchqizil suv ombori qurilgan. 4 qo’shma korxona, 14 aksiyadorlik jamiyati, 20 mas'uliyati cheklangan jamiyatlar va 339 sanoat, qurilish va boshqa korxonalar bor, parrandachilik fabrikasi ishlab turibdi. Sug’oriladigan yerlarga paxta, g’alla, sabzavot, kartoshka, poliz ekinlari ekiladi. Yozda temperaturaning yuqoriligi, iliq-issiq kunlarning uzoq davom etishi tumanda issiqsevar subtropik o’simliklar-ingichka tolali paxta, xurmo va hatto shakarqamish, apelsin, mandarin yetishtirishga imkon beradi. 394 ga yer mevazor, 242 ga yer tokzor bilan band. Ihota daraxtzorlari, o’rmonzorlar mavjud. 1858 fermer xo’jaligi faoliyat ko’rsatadi. Jamoa va xususiy xo’jaliklarida qoramol, qo’y va echki, parranda, yilqi boqiladi. Tumanda 32 umumiy ta'lim maktabi, 2 kasb-hunar kolleji, litsey, bolalar musiqa, bolalar va o’smirlar sport maktablari faoliyat ko’rsatadi. Tuman markaziy kutubxonasi va uning tarmoqlari, 5 madaniyat uyi va klub muassasasi ishlab turibdi. 2 kasalxona, 9 qishloq vrachlik, 18 feldsher-akusherlik punktlari va boshqa tibbiy muassasalar aholiga xizmat ko’rsatadi, 3 dorixona mavjud. “Jayranxona” bal’neologik shifoxonasi, Respublika tibbiy tiklanish va fizioterapiya ilmiy tadqiqot institutining Termiz filiali, sayyohlik maskani tashkil etilgan. Tuman markazidan Termizga avtobuslar qatnovi yo’lga qo’yilgan. 1990 yilda tumanda radioeshittirish va teleko’rsatuvlarni kuchlantirib beruvchi teleminora (balandligi 368 m) ishga tushirildi. Eski Termiz xarobalari, Qoratepa, Chingiztepa, Qirqqiz qal’asi, To’rtauz gumbaz maqbarasi xarobalari, Uyiqgumbaz, Xo’ja Rushnoiy maqbaralari, Hakim at-Termiziy, Sulton Saodat me'moriy majmuotlari, Katta masjid, Kokildor ota xonaqosi kabi me'moriy yodgorliklar saqlangan.

Ma’lumot: O’zbekiston milliy ensiklopediyasi. “O’zbekiston milliy ensiklopediyasi”. T.2006.


Sayt “OPEN WEB” tomonidan tayyorlangan