Denov tumani. Surxondaryo viloyatining shimoli-sharqiy qismida joylashgan. 1926 yil 29 sentyabrda tashkil etilgan. Maydoni 0,75 ming km². Aholisi 289,1 ming kishi, asosan, o’zbeklar, shuningdek, tojik, rus, tatar va boshqa millat vakillari ham yashaydi. 1 km² ga o’rtacha 385,5 kishi to’g’ri keladi (2005). Tumanda 1 shahar (Denov), 1 shaharcha (Do’stlik), 18 qishloq fuqarolari yig’ini bor. Markazi - Denov shahri. Tumanning shimol, janubi va markaziy qismi tekislikdan iborat. Sharqda Bobotog’, g’arbda Boysuntog’ tizmalari bilan o’ralgan. Hududidan Surxondaryo, To’polondaryo, Sangardak, Qizilsuv daryolari, hazorbog’, Oybarak kanallari, Dayto’lak, Denov ariqlari oqib o’tadi. Yer osti suvlariga boy bo’lganligi uchun artezian suvlaridan keng foydalaniladi. Sanoat korxonalari asosan qishloq xo’jalik mahsulotlarini qayta ishlashga ixtisoslashgan. Paxta tozalash, yog’ ekstraksiya, konserva, sut, ta’mirlash-mexanika, g’isht zavodlari, qurilish, neft mahsuloti korxonalari, paxta chuvish, qandolatchilik fabrikalari, jami 38 sanoat korxonasi, 200 ga yaqin kichik korxona faoliyat ko’rsatadi. Qishloq xo’jaligining asosiy tarmoqlari: paxtachilik, bog’dorchilik, tokchilik, limon yetishtirish. Tog’ etaklarida lalmikor dehqonchilik (asosan, bug’doy va arpa) bilan shug’ullaniladi. Ekin maydonlariga paxta, g’alla ekiladi. Yaylovlarda qoramol, qo’y (hisor qo’ylari) boqiladi. Dehqon, fermer xo’jaliklari faoliyat ko’rsatadi. Shreder nomidagi bog’dorchilik, tokchilik va vinochilik korporatsiyasining tajriba stansiyasi joylashgan. Denov dendrariysi deb atalgan bu ilmiy labaratoriyada tabiatning 900 dan ziyod o’simligi, mevali o’simliklar (jumladan, Yaponiyadan keltirilgan palma daraxti, magnoliya, xurmo, apelsin, yong’oq, boshoqli o’simliklar) yetishtiriladi. 87 umumiy ta’lim maktabi, gimnaziya, 2 litsey, san’at,  musiqa maktablari, 3 kasb-hunar maktabi, 58 jamoat kutubxonasi, 46 klub muassasasi, 2 madaniyat va istirohat bog’i bor. Tuman markaziy kasalxonasi, 13 qishloq vrachlik ambulatoriyasi, 6 qishloq vrachlik punkti, poliklinika, 56 feldsher-akusherlik punktlari, 4 dispanser aholiga xizmat ko’rsatadi. Tuman hududidan xalqaro temir yo’l Xo’jand- Dushanba, Termiz-Dushanba  avtomagistral yo’li o’tgan.

Ma’lumot: O’zbekiston milliy ensiklopediyasi. “O’zbekiston milliy ensiklopediyasi”. T.2006.