SHAXSIY KABINETGA KIRISH
.
SSENARIYLAR
 Barcha ssenariylar
ARXIV
Mart 2021
YaDuSeChPaJuSh
 123456
7910111213
14151617181920
21222324252627
28293031   
Iste’dodli rejisso Muzaffar Muhamedov tavallud topgan kun
1902-01-01

Muzaffar  Muhamedov

(1902-1995)

O’zbek milliy  teatrining  tashkilotchilaridan  biri, iste’dodli  rejissor  Muzaffar  Muhamedov  1902 yil  1yanvarda Toshkentda  tug’ildi. Mehnat  faoliyatini  1918  yilda  Toshkentda, Hamza  rahbarligidagi  “Turk  kuchi”  truppasida  aktyor  sifatida  boshlaydi. 1919-1924  yillarda o’zbek  namuna  drama  truppasida  aktyor  bo’lib  ishlaydi.

M.Muhamedov  1924-1927  yillarda  Moskva  O’zbek  drama  studiyasida  o’qiydi. O’qishni  tugatgach, 1928-30 yillarda Andijon  teatrida  bosh  rejissor, 1930-39  yillarda  o’zbek  davlat  musiqali  drama  teatri, 1939-43 va  1950  yillarda Alisher  Navoiy  nomidagi  Opera  va  balet  teatri  rejissori, 1943-50  yillarda  Muqimiy  nomidagi  musiqali  drama  va  komediya  teatrining  bosh  rejissori  bo’lib  qizg’in  ijod  qildi. Faoliyati  mobaynida  o’nlab  dramatik, musiqali  drama  va  opera  asarlarini muvaffaqiyatli  ravishda  sahnalashtirib, o’zbek  teatr  san’atining  rivojiga  katta  hissa  qo’shdi. U  sahnalashtirgan  T.Aminovning “Zafar”, S.Husaynning “G’alaba”, Fitratning “Arslon”, K.Gossining “Malikai Turandot”  dramalari, K.Yashin  va Glierning  “Gulsara, K.Yashin  va T.Jalilovning “Layli  va Majnun”, G’.Zafariyning “Halima”, S.Abdulla , T.Jalilov, B.Brovsinning “Tohir  va Zuhra” , Z.Fatxullin  va D.Zokirovning “G’unchalar”, S.Abdulla , T.Jalilov, B.Nadejdinning “Alpomish” musiqali  dramalari, R.Glier va T.Sodiqovning “Gulsara”, “Layli va Majnun”, S.Vasilenko  va M.Ashrafiyning “Ulug’  kanal”, R.Hamroyevning “Zulmatdan  ziyo”,S.Boboyevning “Hamza” kabi opera  asarlarining  ko’pchiligi  o’zbek  teatr san’atining  oltin  hazinasidan  munosib  o’rin  egalladi.

M.Muhamedov dramaturg  sifatida  ham  faoliyat  ko’rsatib, K.Yashin  bilan ijodiy  hamkorklikda  1932 yilda “Ichkarida” pyesasini, “Gulsara” (1948), “Dilorom” (1958), S.Abdulla  bilan  hamkorlikda  “Maysaraning  ishi” (1956)  opera-librettolarini  yozdi.

O’zbek  teatr  san’atining  ulkan  tashkilotchilaridan  biri, talantli  rejissyor  M.Muhamedovning  xizmatlari  munosib  taqdirlandi. 1937  yilda  unga  “O’zbekistonda  xizmat  ko’rsatgan  san’at  arbobi”, 1959  yilda “O’zbekiston  xalq  artisti”  unvonlari  berildi.

M.Muhamedov  1995  yilda Toshkentda  vafot  etdi.

M.Muhamedov  mohir  rejissyor, o’zbek  teatr  san’atining  tashkilotchilaridan  biri  sifatida  madaniyatimiz  tarixida  o’chmas  iz  qoldirdi.


Sayt “OPEN WEB” tomonidan tayyorlangan