Qoriyeva Bernora Rahimovna-1936 yil  28 yanvar kuni Toshkent shahrida tug‘ilgan- balerina, baletmeyster-(1973), O‘zbekiston xalq artisti(1964), Qirg‘iziston xalq artisti(1996), professor(1985). Toshkent (1952)  va Moskva Katta opera va balet teatri qoshidagi akademik xoreografiya bilim yurtini (1955), Toshkent madaniyat institutini (1980)  tugatgan. 1955 yildan Navoiy nomidagi opera va balet teatrida balerina, baletmeyster. 1985-98 yillarda O‘zbekiston teatr  arboblari uyushmasi raisi, 1994 -2002 yillarda Navoiy nomidagi opera va balet teatri direktori va badiiy rahbari. Qoriyeva repertuari asosini jahon mumtoz  va zamonaviy baletlar tashkil qiladi: Mariya (B.Asafyev,”Boqchasaroy favvorasi” ), Shopeniana(F.Shopen, I.Glazunov “Shopeniana”), Jizel (A.Adan, “Jizel”), Odetta-Odilliya (P.Chaykovskiy “Oqqush ko‘li”), Frigiya (A.Xachaturyan “Spartak”), Xonim (D.Shostakovich “Xonim va bezori”) va boshqalar. Mumtoz balet texnikasini puxta egallagan aktrisa har bir obrazda qahramonlarining ichki kechinmalari, his-tuyg‘ularini berishda mohirlik ko‘rsatadi. Bu ayniqsa, zamondosh kompozitorlar yaratgan “Maskarad”(Nina), “Momaqaldiroq so‘qmoqlari” (Sari), “Don Juan”  (Donna Anna), “Anna Karenina”(Anna Karenina),  kabi baletlarida o‘z ifodasini topdi. Milliy repertuarda  u gavdalantirgan Mehri  (M.Leviyev, “Suhayl va Mehri”), Soxani, Zarrina (M.Ashrafiy ,  “Sevgi tumori”,”Sevgi va qilich”), Nurxon (A.Kozlovskiy, “Tanavor”), Nargis (U.Musayev, “Afsonalar vodiysida”) obrazlari madaniy hayotda katta voqea bo‘ldi. U “Muhabbat afsonasi” (T.Jalilov, B.Brovsin)  opera-baletining balet partiyalari ijodkoridir. 80-yillarning  1-yarmida Qoriyeva , Xamza, Blok, Turgenev asarlari asosida “Zaharli hayot”, “Notanish ayol”, “Elegiya” baletlarini yaratilishida  faol qatnashib, o‘zi Maryam, Ayol hamda Asya Polozova va Liza Kalitina kabi rus  ayollarining dramatik obrazlarini yaratdi. Ketma-ket Julyetta, Ofeliya (P.Chaykovskiy, “Romeo va Julyetta”, “Hamlet”), Dezdemona (Persell, “Otello”) obrazlarini gavdalantirdi. Qoriyeva ijodiga bag‘ishlangan “Bernora Qoriyeva raqsga tushadi” va “Men balerinaman” filmlari ishlangan.   Yevropa, Osiyo,  Shimoliy va Janubiy Amerika mamlakatlarida gastrolda bo‘lgan. Hamza nomidagi O‘zbekiston Davlat mukofotlari (1970, 1982) laureati. “Do‘stlik” ordeni (1996) bilan mukofotlangan.

O’zbekiston  Milliy  Ensiklopediyasi.  T.,  2000.