“Ipak yo`li” Banki 1990 yil 31 dekabrda o`z ish faoliyatini boshlagan. Bankning yirik aksiyadorlari: “O`zbekinvest” eksport-import sug`urta  milliy kompaniyasi, “Zamon Plus Sarmoya” investitsiya kompaniyasi, “Oziq-ovqat mollari”, “Baraka” universal lizing kompaniyalari, “Kafolat” sug`urta kompaniyasi. Bank jismoniy shaxs bo`lgan mijozlari uchun hisobvaraqalar ochish va ularni yuritish, kassa xizmati ko`rsatish, kommunal va boshqa to`lovlarni qabul qilish, bank o`tkazmalarini amalga oshirish, xorijiy valyutani olib chiqib, ketishga ruxsatnomalar berish, plastik kartochkalarni muomalaga chiqarish va ular  bilan hisob-kitoblarni amalga oshirish, milliy va chet el valyutasidagi mablag`larni omonatlarga jalb qilish, iste'mol kreditari  ajratish, ipotekali kreditlash, plastik kartochkalari orqali kreditlash kabi xizmat turlarini bajaradi. Bankning respublika bo`yicha filiallari  soni 7ta, shunday 5 tasi Toshkent shahrida (Bosh ofis, Mirzo Ulug`bek filiali, O`rikzor filiali, Yakkasaroy filiali, Sag`bon filiali). Bankning Toshketn shahridagi filiallari tomonidan 2007 yil mobaynida 106,4 mlrd. so`mlik  loyihalar  moliyalashtirildi. Shundan ishlab chiqarishni rivojlantirish uchun 51,2 mlrd. so`m, qurilish korxonalariga 1,7 mlrd. so`mlik hamda xizmat ko`rsatish sohasini rivojlantirish uchun 36,1 mlrd. so`mlik kreditlar berildi. Umuman 80200 ta mijozga xizmat ko`rsatildi, ularning 69600 tasi jismoniy shaxslar (2008).