Mulla Muso ibn Mulla Isoxo’ja Sayramiy 1836 yil 23 avgustda Sharqiy Turkiston, Sayram tumanida tavallud topgan. Tarixchi, davlat arbobi mudarris, adib va shoir. Muso Sayramiy uyg’ur olimi Mulla Usmon oxund xalfadan Qur’on, hadis, tarix, adabiyot, ilmi nujum, geografiya, arab va fors tillarini o’rgangan. “Mulla Muso”, “Bola mulla”, “ Mulla abjad” nomlari hamda “Sayramiy” taxallusi bilan shuhrat qozongan. 19 asrning o’rtalarida  Sharqiy turkistonda tashkil topgan uyg’ur davlati ma’muriyatida har xil lavozimlarda ishlagan. Muso Sayramiy “Tazkiratul-avliyo, fi muftaxul imon”, “Tarixi Aminiya”, “ Tarixi Hamidiya” kabi tarixiy asarlar va “Devoni masnaviy” she’rlar to’plami, “Salomnoma” nomli asarlar muallifi. “Tarixi Aminiya” asarida  Turkiston-Mo’g’ulistonda hukm surgan xonliklar va xonlar, Yorkend xonligi, uni Manjur-Xitoylar tomonidan bosib olinishi, yerli aholining mustaqillik uchun kurashlari hikoya  qilingan. Muso Sayramiy asarlari Turkistonning 14-19 asrlar tarixini o’rganishda muhim manba hisoblanadi.

Ma’lumot: O’zbekiston milliy ensiklopediyasi.Toshkent. 2003.