SHAXSIY KABINETGA KIRISH
.
SSENARIYLAR
 Barcha ssenariylar
ARXIV
Dekabr 2019
YaDuSeChPaJuSh
1234567
8910121314
15161718192021
22232425262728
293031    
Bolajoningizni kitob mutolaasiga qiziqtirishning yetti qoidasi

Ba’zi bolalar haqiqiy kitobsevar  bo‘lsa, boshqalari esa o‘qishni yoqtirmaydilar. Shunga qaramay, barcha bolalarni ham kitob mutolaasiga qiziqtirish mumkin.

Farzandlarni majburlamasdan  o‘qishga qanday chorlash mumkin? Quyidagi maslahatlar farzandingizni kitobga mehr qo‘yishiga yordam beradi.
Zamonaviy texnologiyadan foydalaning

Siz farzandingiz kitob o‘qishini istaysiz, u esa kompyuter o‘yinini xohlaydi. Nima qilish kerak? Kitob mutolaasini ana shu jarayonga yaqinlashtiring, ya’ni zamonaviy texnologiyalardan foydalaning. Kompyuter yoki planshetdan foydalangan holda elektron kitoblardan o‘qib bering. Internetda ko‘plab bepul elektron kitoblar topishingiz mumkin. Ularni on-layn o‘qish yoki yuklab olish ham mumkin. Ba’zi elektron kitoblarning qog‘oz nusxasiga nisbatan imkoniyatlari keng. Masalan, audio va video tasvirlar bilan boyitilgan. Bu esa polaponingizni qiziqtirishi aniq.

Mutolaa burchagi qilib bering

Kichkintoyingizni chalg‘itmaydigan, tashqi shovqin-surondan holi bo‘lgan mo‘jazgina “uycha” yoki burchak qilib bering. Ana shunday mo‘jazgina chodirchalar ham bolajoningiz uchun “uycha” sifatida xizmat qilishi mumkin. Bu “mutolaa hududi”ga yumshoq ko‘rpacha va yastiqchalar qo‘yib, kitob o‘qishi uchun qulaylik yarating. Devorlariga turli ertaklardagi qahramonlarning suratlari bilan bezatsangiz, bolajoningiz o‘zini haqiqiy ertaklar olamiga tushib qolganday his qilib, kitob o‘qishga ilhomi keladi. Bugun bolalar o‘yinchoqlari sotiladigan do‘konlarda bolalar uchun jajji chodirchalar sotiladi. 

 

Bolajoningizni tez-tez kutubxonaga olib boring
         Polaponingizni oxirgi marta qachon kutubxonaga olib bordingiz? Agar farzandingizda doimiy ravishda kitob o‘qish ko‘nikmasini shakllantirishni istasangiz, haftasiga hech bo‘lmaganda bir marta kutubxonaga olib boring. Shoshmasdan kitoblarni birgalikda ko‘rib chiqing, birgalikda tanlang, birgalikda o‘qing. Uyda o‘qish uchun ham kitoblar oling. Bundan tashqari, kitoblarni solish uchun “kitoblar sumkasi”ni ham qilib bering. Ahamiyatsizdek tuyuladigan mayda-chuyda amallar  muhim  usullar bo‘lib, ular farzandingizning kitobxon bo‘lishiga, bora-bora kitoblar doimiy hamrohiga aylanishiga yordam beradi.

Kitoblar tez-tez suhbatingiz mavzusiga aylansin

Agar siz bolajoningizni kitob o‘qishga g‘ayratini oshirmoqchi bo‘lsangiz, tez-tez ertaklar, hikoyalar aytib bering, umuman kitoblar va ularning mazmun – mohiyati haqida suhbatlashib turing. Hayotda sodir bo‘lgan haqiqiy voqealarni bolalaringiz o‘qigan ertak va hikoyalar bilan bog‘lashga harakat qiling. Bundan tashqari, ma’lum bir kitobning kino versiyasini birgalikda tomosha qilib, so‘ng solishtirishingiz, kitob va kino versiyasi haqida fikrlarini olishingiz mumkin. Bu esa farzandingizni nafaqat o‘qishga chorlaydi, balki, mushohada qilishga o‘rgatadi, tahlil qilish qobiliyatini shakllantiradi.

Farzandingiz qiziqqan mavzudagi kitoblarni tanlang
         Ba’zi bolalar hayvonot olamiga qiziqsa, ba’zi bolalar ertaklarda boladigan ajdarho, yalmog‘iz kampir, gnom kabi to‘qima mavjudotlar haqidagi ertaklarni eshitishni hush ko‘rishadi. Ba’zi bolajonlar dinozavrlar haqida o‘qib berishingizni so‘rasa, boshqalari koinotdagi boshqa sayyoralar haqida bilgisi keladi. Farzandingiz qiziqishiga qarab kitob tanlang.

Farzandingizga namuna bo‘ling
        Bolalar ota-onasida namuna oladilar. Agar siz muntazam kitob mutolaa qilsangiz, boshqa oila a’zolaringiz bilan turli kitoblar to‘g‘risida tez-tez suhbatlashsangiz, kitobdan zavq olgangizni ko‘rsatsangiz, farzandingizga o‘rnak ko‘rsatgan bo‘lasiz. Kitob o‘qish asta-sekin farzandingizning ham sevimli mashg‘ulotiga aylanib boradi. 

Har kuni kitob o‘qib bering!
        Vaqtingizni ayamasdan, polaponingizga har kuni kitob o‘qib bersangiz, u asta-sekin o‘zi ham muntazam mustaqil  tarzda kitob mutolaa qiladigan bo‘ladi. Uning hayotida kitobxonlik an’anaga aylanadi.

Administrator
Sayt administratori
Kitob fayllari
Fayl nomi Hajmi
Bolajoningizni_kitob_mutolaasiga_qiziqtirishning_yetti_qoidasi_9.docx 13.0 KB Ko‘chirib olish
Ko‘chirib olishni xohlasangiz, saytga a’zo bo‘ling yoki foydalanuvchi nomi ostida kiring.

Hozirgacha hech kim fikr bildirmagan!
Sayt “OPEN WEB” tomonidan tayyorlangan