2 aprel – “Xalqaro  bolalar kitoblari  kuni”

“Xalqaro bolalar kitoblari kuni"ga bag‘ishlangan bayram ssenariysi

 

Sahna ilmu ma’rifatga da’vat etuvchi shiorlar, hadislar yozilgan plakatlar, shoir va yozuvchilarning portretlari bilan bezatiladi. Shuningdek, turli badiiy kitoblardan namunalar, ular haqida ma’lumot beruvchi bukletlar ham qo‘yiladi.

         Tadbirni boshlovchilar va o‘quvchilar olib borishadi. Musiqa sadolari ostida sahnaga boshlovchilar tashrif buyurishadi.

 

   1-boshlovchi:       Har ko‘ngilning orzusi shul erur obi-xayot,

                                 Qadrini bilgan kishiga shubhasiz jondir kitob.

                                 Ko‘zning nuri, dil sururi dillarning darmonidir,

                                 Har qorongu dilga go‘yo mohitobondir kitob.

 2-boshlovchi:         U balodan asraguvchi eng muhim qimmat yarog‘,

                                 Tiyri vaxshat xanjari zillatga qalqondir kitob,

                                 Har kishi yoshlikda qilsa g‘ayrat agar,

                                 Tez zamonda oshno bo‘lmog‘i onsondir kitob.

 

 1-boshlovchi: Assalomu-alaykum hurmatli mehmonlar va kitobsevar do‘stlar!

2-boshlovchi: Assalomu-alaykum mana shu koshonaga yig‘ilgan aziz insonlar!

1-boshlovchi: Kitob – insonning aqliy taraqqiyoti va ma’naviy kamolotiga yordam beruvchi, ilm durdonalarini to‘plab,  avlodlarga yetkazuvchi, o‘tmishni, bugun va ertangi kunga bog‘lab turuvchi ma’naviy boylik.

2-boshlovchi: O‘zbek oilalarida kitobga muhabbat, kitobni asrab-avaylab saqlash va kitobxonlik qadimiy an’analardan bo‘lib, halqimiz ma’naviy kamolotida muhim o‘rin tutib kelyapti. Kitobxonlik-ma’naviy komillik asoslaridan sanalarkan, xalqimizning o‘zi qadar qadimiy tarixga ega. Buni ajdodlarimiz tomonidan uch yarim ming yil ilgari yaratilgan "Avesto" qismati yaqqol tasdiqlaydi. Ajdodlarimiz uni to‘la-to‘kis yod bilmoqni, unga amal qilib yashamoqni e’tiqodiy burch deb bilganlar.

1-boshlovchi: Kitob-dilga nur beradi, dil nuridan esa inson ko‘zi ravshanlashadi, olamni ko‘radi, anglaydi, to‘g‘ri yo‘l ila baxt - saodat topadi. Zaminni, ona-tabiatni oftob isitsa, odam qalbini kitob ilitadi, yoritadi va nurlantiradi. Ya’ni quyosh bo‘lmasa olamning, tabiatning, hayotning bo‘lishi shubha ostida qoladi. Kitob bo‘lmasa, ma’naviyatning rivojlanishi ham mavhum bir fikr bo‘lib qolaveradi.

   2- boshlovchi: Hozirgi axborot asrida, turli vositalardan turfa xil xabarlar olish mumkin.Ammo kitob mutolaasi bilan ham shug‘ullanish juda zarur hisoblanadi.Kitobxonlik kishidan muayyan ko‘nikmalardan tashqari zehnlilikni ham talab qiladi.Shunday ekan, kitob o‘qish kishi ongi va fikrlash qobiliyatini o‘stiradi.

      

   1-boshlovchi: Kitobxonlikning bosh sharti - o‘qiganni uqmoq, anglab, tushunib,o‘zlashtirib olmoqdir. Binobarin, har bir kitobxon tushunib, anglab o‘qishga erishish darkorligini muttasil yodda tutmog‘i shart.

 

  2-boshlovchi: Shunday ekan, bugun ushbu dargohga 2 aprel –“Xalqaro bolalar kitoblari kuni”ni nishonlash uchun yig‘ildik.

    

 

    1-boshlovchi: Jahonning ko‘pgina mamlakatlari 2 aprel sanasini “Xalqaro bolalar kitoblari kuni “sifatida nishonlashadi. Bu sananing ham o‘ziga xos tarixi bor albatta. 1967 yilda Xalqaro bolalar kitobi kengashi 2 aprel sanasini bolalar kitoblari kuni deb nishonlash to‘g‘risida qaror qabul qildi. Bu sana o‘z-o‘zidan tanlangan emas. Hamma gap shundaki, ushbu sanada buyuk ertakchi Xans Kristian Andesen dunyoga kelgan kundir.

        2- boshlovchi: Bu kun jahon miqyosida sayyoramiz kelajagi bo‘lmish yosh avlodga ularning intellektual salohiyati va ma’naviy boyligini shakllantirishda kitobning mohiyati va o‘rnini anglashga da’vat qiladi.

       1-boshlovchi: An’anaga ko‘ra bugun bayramimizga mashhur bolalar yozuvchilari va shoirlari taklif qilingan. Tantanamizga bolalar yozuvchilaridan tashqari mashhur bolalar rassomlari ham taklif etilgan, ular ushbu kunni targ‘ib qiluvchi plakatlarga rasmlar chizganlar. Shuningdek, tadbirimizga  kitobsevar o‘quvchilar ham tashrif buyurganlar navbatni ularga beramiz.

Sahnaga kitob siymosida bir o‘quvchi chiqadi va she’r o‘qiydi.

 

Tanishaylik, men - kitob,

Asl bilimlarga kon.

Boylik beray behisob,

Bo‘lsang agar qadrdon.

 

Lekin yirtib, burdalab,

Kamaytirma varag‘im.

Sendan yana bir tālab

Iflos qilma hech yog‘im.

 

Yana bir o‘quvchi kitobni sharaflab she’r o‘qiydi.

 

Kitobda bilim lim-lim,

O‘qi qunt bilan, do‘stim.

Topmoq istasang kamol,

Oltin olma, duo ol.

Tinmay o‘qisang agar,

Ko‘p narsani o‘rgatar.

Bilsang, yo‘lingda oftob,

Bilim koni bu - kitob.

 

        2- boshlovchi: Rivoyat aytadi.

 

      O‘tgan zamonda bir podsho vaziru ulamolarini yoniga chaqirib ularga «Dunyoda eng zo‘r, kerakli va hamma narsadan xabardor qiluvchi nima?» - degan savolni beribdi. Ulamolarning biri qilich desa, ikkinchisi hamma narsadan xabar beruvchi narsa - oynai jahon, debdi. - Uch kun muhlat beraman, - debdi ulamolarining javobidan darg‘azab podsho. Qo‘shni podsholikda ta’rifi yetti iqlimga ketgan donishmand yashar ekan. Vazir podshoning savoliga shu donishmand javob bēra olishiga aqli yetibdi va uni izlab topibdi. Unga podshoning savolini aytibdi. Donishmand hech ikkilanmay: «Kitob. Chunki kitob bilim beradi. Dunyodagi eng qudratli narsa esa bilimdir», - debdi.

Donishmandning vazirga bergan javobi podshoga ma’qul tushibdi.

 

1-      boshlovchi: Endi navbat o‘quvchilar ijrosidagi “Kitobim qo‘limda” qo‘shig‘iga.

O‘quvchilar she’r aytadilar.

 

Men kitobni ochaman,

Kitob aqlimni ochar.

Men kitobim ochaman,

G‘aflat tun kabi qochar.

 

                             Men kitobni ochaman,

                             Kitob ochar dunyoni.

                             Men kitobni ochaman,              

                             Kitob ochar ziyoni.

 

                                                            Kitob qalbda mudragan,

                                                           Tuygularni qo‘zg‘atar.

                                                           Tong chog‘i u onamday,

                                                            Orzularni uyg‘otar.

 

 

2-boshlovchi: Hozir o‘quvchilarimiz sizlarga o‘zida durdona fikrlar mujassamlashgan  hikmatlardan  namunalar  aytishadi.

 

1-o‘quvchi:            Bilimdan ortiq boylik yo‘q.

 

2-o‘quvchi:            Kitob - bilim manbai.

 

3-o‘quvchi:             Bilgan o‘qir, bilmagan to‘qir.

4-o‘quvchi:             Avval o‘rgan, keyin o‘rgat.

5-o‘quvchi:             Aqlning qayrog‘i - bilim.

6-o‘quvchi:             Ilm olsang dunyoda,

                                Aqling bo‘lar ziyoda.

7-o‘quvchi:             Kitob - xazina,

                                Bilim - boylik.

8-o‘quvchi:             Bilim - baxt keltirar.

 

9-o‘quvchi:            Kitob - aql chirog‘i.

10-o‘quvchi:          Kitobdan yaxshi do‘st yo‘q.

         

          1-boshlovchi: So‘z navbatini kechamizning mehmoni bolalar shoiri va tarjimon Tursinboy Adashboyevga  beramiz.

          2-boshlovchi: Barcha mavjudotlar ichida eng oliysi insondir. U o‘z odobi va ilmi, go‘zal qalbi hamda mehnati bilan sharaf sohibidir.

 

Ey, O‘zg‘on naslidan, yaralgan o‘zbek,

Shavkati olamga taralgan o‘zbek.

Asli nasli toza buyuk millatsan,

Uluslar ichida qutbi izzatsan.

 

                     O‘quvchi:

                      Orzularim bir jahon,

                      Poydevor unga kitob,

                      Hayotim yo‘llarini,

                      Yoritar nurli oftob.

   2-boshlovchi: Biz tarixan ulkan madaniyatga ega xalqning bilimi kuchli, ma’naviyati yuksak avlodimiz. Barkamollikka, komillikka erishgan Najmiddin Kubro, Jaloliddin Manguberdi, Yusuf Xos Hojib, Alisher Navoiy, Abdulla Qodiriy, Cho‘lpon kabi go‘zal qalb sohiblari, aziz kitobxonlar vakilimiz.

 1-boshlovchi: Kitob - sehrli olām. Unga bir sho‘ng‘isang, qachon chiqib ketishingni bilmaysan. inson kitob bilan do‘st tutinar ekan, u hech qachon to‘g‘ri yo‘ldan adashmaydi. Kitob tufayligina  inson olamga boshqacha ko‘z bilan boqadi.

         Har bir insonning o‘z sevimli kitobi va yozuvchisi bo‘ladi. Kitob saodāt topish uchun o‘qilmaydi. Uning o‘zi bir soadatdir.

    2-boshlovchi: Tantanamizga bolalar yozuvchilaridan tashqari mashhur bolalar rassomlari ham taklif etilgan.So‘z navbati ularga.

   1-boshlovchi: «Kitob barcha bunyodkorlik, yaratuvchanlik va aql-idrokning, ilmu donishning asosidir, hayotni o‘rgatuvchi murabbiydir», -degan edi buyuk sarkarda bobomiz Amir Temur. Endi donolarning kitob haqidagi qimmatli fikrlarini tinglaymiz.

             1-o‘quvchi:   Kitob - sehrgar. U dunyoni qayta qurdi. Unda odamzodning aqli mujassam, u kishilik tafakkurining ustuni. Kitobsiz olām yovvoyilar olamidir.

 2-o‘quvchi:  Kitoblar jonsiz, ammo sodiq do‘stlardir.

 

3-o‘quvchi: Hayotda sening aqlli bo‘lishingga beminnat xizmat qiladigan ulug‘ ustoz kitobdir.

2-boshlovchi: Endi navbat qiziqarli ma’lumotlarga asoslangan «Bilasizmi?» sahifasiga.

1-o‘quvchi: Tib ilmining buyuk namoyandasi Ibn Sino bobomiz butun umri davomida ijod, ilmu tadqiqot bilan shug‘ullanib, 276 ta kitob yozib qoldirgan. Uning kitoblari asosan ilmiy-tahliliy asarlardir. Hajmi ham zamonaviy ilmiy-ommabop kitoblardan bir necha barobar katta bo‘lgan. Birgina «Ash-shifo» kitobining o‘zi 18 jildni tashkil etgan.

 

2-o‘quvchi: Parijdagi Milliy kutubxonada saqlanayotgan qo‘lyozma dunyodagi eng qadimiy kitob hisoblanadi. Hikmatlar yig‘indisidan iborat bu kitob, qadimda Misrning Fiva shahrida eramizdan 2600 yil muqaddam topilgan.

3-o‘quvchi: Nyu-Yorkdagi muzeylardan birida bo‘yi 3 metr, qalinligi 1 metr, og‘irligi esa 125 kg keladigan dunyodagi eng katta kitob saqlanmoqda.

4-o‘quvchi: «Tib qonunlari» kitobi XII-XVI asrlar oralig‘ida 40 marta qayta nashr qilingan. Bu kitobga hozir ham ehtiyoj katta.

 

5-o‘quvchi: Eng ko‘p jildli kitob «Fransuz ensiklopediyasi» bo‘lib, u 1200 jilddan iborat.

6-o‘quvchi: Markaziy Osiyo xalqlari kitobni qadim-qadimdan e’zozlab kelganlar. Ushbu hududdagi dastlabki kutubxona eramizning II asrida Xorazmda faoliyat ko‘rsatgan.

  1-boshlovchi: Aziz o‘quvchilar! Ko‘rdingizmi, yer yuzidagi ko‘plab insonlar kitobni sevib, o‘zlariga yaqin do‘st bilib, e’zozlar ekanlar. Shunday ekan, siz ham bilimlar xazinasi bo‘lgan kitobga mehr qo‘ying, uni asrab-avaylang.

   Boshlovchilar: Hurmatli o‘quvchilar, yuqoridagi fikrlarni tinglab, sizning kitobga bo‘lgan mehringiz yanada oshdi, degan fikrdamiz. Shu narsaga doimo amal qiling! O‘qib o‘rganayotgan kitoblarimizni ko‘z qorachig‘idek asrab, avaylab saqlaylik. Bu kitoblardan kelajak avlodlar ham foydalansinlar.

     O‘g‘il bolalar ijrosida «Andijon polkasi» raqsi tomoshabinlarga havola etiladi.

     Tadbir yakunida o‘quvchilar «Barkamol avlod» she’rini aytadilar.

 

    Musiqa sadolari ostida tadbir yakunlanadi.