Япония об-ҳаво бюроси мамлакат вилоятларидаги олча - сакура дарахтининг гуллаш санаси кўрсатилган инфографика-харитани тайёрлади. Харитага асосан, 31-март куни Токио, Хиросима, Фукуока, Осака каби мамлакатнинг нисбатан марказий ва жанубий қисмларида сакура гуллаган. 10-апрел куни Ниигатада, 20-апрел куни Нагоя ва Сендайда, 30-апрел куни эса Япониянинг шимолий префектураларида япон олчасининг гуллаши тахмин қилинмоқда. “Кун” нашрининг маълум қилишича, Сакура дарахтлари, Япония об-ҳаво бюроси ҳисоб-китобларига кўра, энг кеч мамлакат шимолидаги энг йирик орол - Хоккайдода гуллайди. Қиши энг совуқ бўлган Япониянинг ушбу минтақаси аҳолиси 10-май куни сакура гулларини кўриши кутилмоқда. Сакура - манзарали олча дарахтининг японча номи бўлиб, у Япониядаги энг кўп ардоқланадиган ўсимлик ҳисобланади. Ҳар йили бу дарахтнинг гуллаши муносабати билан Японияда байрам нишонланади.