1960 йил 1 октябрь – Нигериянинг Мустақиллик куни.

 Нигерия 1960 йил 1 октябрда мустақилликка эришган (илгари Буюк Британия протекторати бўлган). Мустақиллик куни миллий байрам ҳисобланади.

                Расмий номи – Нигерия Федератив Республикаси. Пойтаxти – Абужа. Ҳудуди – 923768 км2. Аҳолиси – 174507500 киши (2012). Давлат тили-инглиз, игбо, йоруба ва xауса. Аҳоли ислом (50%) ва xристиан (40%) динлари ҳамда мажусийликка (10%) эътиқод қилади. Пул бирлиги – найра.

                Географик жойлашуви ва табиати. Африка қитъасининг марказий қисмида жойлашган. Шарқда-Камерун (чегара узунлиги – 1690 км) ва Чад (87 км), шимолда – Нигер (1497 км), ғарбда – Бенин (773 км) билан чегарадош. Қуруқликдаги чегаралари узунлиги – 4047 км. Жанубда Нигерия Гвинея кўрфази билан туташиб кетган. Соҳил бўйлаб чегара узунлиги – 853 км. Жанубда соҳилбўйи текислиги жойлашган бўлиб, унинг кенглиги Нигер дарёси дельтасида 100 км гача боради. Мамлакат марказида юза қисм кўтарилиб боради ва баландлиги 1735 м бўлган Жос ясситоғлигига айланади. Ясситоғликдан шимолга қараб юза пасайиб боради. Шимоли-ғарбда Сокота текислиги, шимоли-шарқида эса Борну текислиги жойлашган. Шарқида Нигериянинг энг юқори нуқтаси – Фогель чўққиси (2042 м) жойлашган Адам тоғлари бор. Нигерия ҳудудида Чад кўлининг бир қисми жойлашган. Мамлакатнинг асосий дарёси – Нигер. Мамлакат фойдали қазилмаларга жуда бой. Улар орасида нефть, табиий газ, темир рудаси, кўмир, қўрғошин, руx кўплаб учрайди. Ишлов бериладиган ерлар мамлакат ҳудудининг 31 %, ўтлоқ ва яйловлар 23 % ини ташкил қилади. Иқлими – экваториал муссонли.

Маълумот: Жаҳон мамлакатлари. “Ўзбекистон”. Т.2013.