Попов Александр Степанович (1859.04.03, Свердлов вилояти - 1905.31.12, Петербург) - рус физиги ва электротехниги, радио ихтирочиси. Электр-магнит тўлқинларни амалий мақсадларда қўллаш асосчиларидан бири. Попов Александр электр-магнит тўлқинлар кукуни детектори (Бранли-Лоджа когерери)ни такомиллаштирди (1895) ва унинг асосида электр сигналларини симсиз узатадиган қабул қилгич (приёмник)ни (яъни радио алоқани) яратди. Ниҳоят 1895 йил 25 апрел куни ўзи яратган радиоприёмникни намойиш қилди. У радиотўлқинларни 1897 йил баҳорида 600 м масофага, 1897 йил ёзида 5 км масофага, 1901 йил 150 км масофага узатишга эришди. Попов Александр газ разрядларини қайд қиладиган асбоб («яшин қайд қилгич») ни ҳам яратди (1895). Парижда 1900 йил ўтказилган халқаро кўргазмада Попов Александр олтин медал билан тақдирланди.